Die vakansie is verby, en die perde (wat gerus en geëet het terwyl jy op die strand baljaar het) moet weer begin werk. Januarie word dikwels opgeneem met die “terug-skool-en-werk-toe” dinge, en baie ruiters begin eers einde Januarie of begin Februarie weer ernstig met hul perde werk.

Februarie is een van die warm somermaande, en dis nie die ideaal om in die hitte met ‘n half-fiks perd hard te werk nie. Maar dis hoe dit is, en al wat ons kan doen is om versigtig te wees en die perd te help om dit te kan hanteer.

Terwyl jy ry

• Gee jou perd kans om water te drink, oral waar daar is. Gooi hom ook nat – vat ‘n plastiekhouer saam, en moenie ‘n spons in die water druk nie.
• Rus as jy bo-op ‘n koppie kom of nadat julle ‘n steil opdraande uitgery het. Staan in die koelte, gee water as daar is, benut die koel windjie; na ‘n ruk se herstel kan jy weer aangaan.
• Asemhalingstempo is gewoonlik een derde tot ‘n kwart van die harttempo. Inversie – as asemhaling vinniger is as die harttempo – beteken jou perd het dringend hulp nodig om af te koel en die balans te herstel. Moet nie verder ry as dit gebeur nie, koel die perd af en stap terug huis toe.

Elektroliete

• Perde wat gery word sweet. Sweet is nie net water nie – dit bevat ‘n groot hoeveelheid elektroliete soos kalium, natrium, chloried, magnesium en kalsium. Daar is al baie oor elektroliete geskryf, maar dis ‘n onderwerp op sy eie. Hou tog in gedagte dat ‘n tekort aan elektroliete kan lei tot verskeie probleme (soos onderdrukte drinkrefleks – die perd drink nie, al is hy gedehidreer – verswakte bloedsomloop en gevolglike verswakte verspreiding van suurstof en voedingstowwe deur die liggaam, bonsing [‘thumps’], spierkrampe, spiertrillings, onreëlmatige hartritme, dermstilstand, swak nierfunksie, en algehele swak herstel van die perd na oefening).
• Dis noodsaaklik om elektroliete aan te vul. Baie elektrolietprodukte is kommersieel beskikbaar, maar kies iets wat hoofsaaklik natrium (Na), chloried (Cl), kalium (K) en kalsium (Ca) bevat.

Koel voere

• Hitte word opgewek tydens die verteringsproses. Dis onvermydelik, maar daar is voere (sogenaamde ‘koel voere’) wat daarop gemik is om hierdie hitte tot die minimum te beperk.
• Die graan (soos hawer) wat as bestanddele gebruik word, word tydens die vervaardigingsproses aan spesifieke prosesse (soos mikronisering) blootgestel wat dit makliker verteerbaar maak. Minder hitte word dan tydens vertering opgewek, en minder van die graan beland in die dikderm, waar stysel nie deur ensieme verteer word nie, maar gefermenteer word, en fermentasie produseer baie hitte.
• Meer vet word in die “koel” voere gebruik. Vet word maklik in die dunderm verteer en daar word bykans geen hitte gevorm tydens die verteringsproses nie.