|
Ek het altyd daarvan gedroom om op ‘n perd in die veld rond te ry, totdat ek eendag op ‘n
advertensie afgekom het by ‘n veearts se spreekkamer: “Golden Eagle Perderitte, 30 km buite
Bloemfontein op die N1 in die rigting van Kroonstad. Ry tussen wildsbokke, rante en klowe op
goed-afgerigte perde. Maanlig-ritte in die somer. Geniet die buitelewe op ‘n perd se rug.”
 |
Die plesierrit van ongeveer twee ure strek tussen en oor die rantjies, klowe, doringbome,
bosse, witstinkhout-bome, wild en oor verskeie aangrensende plase |
Ek het sommer gou ‘n perd bespreek vir die eerste beskikbare
Saterdag.
Aangesien ek al by verskeie plekke in Bloemfontein
gaan ry het, was ek maar meer van dieselfde te wagte.
Gewoonlik ry mens maar net in ‘n klein kampie op ‘n plot –
as jy gelukkig is kan jy dalk op die buurman se plot ook ry.
Dan durf jy ook nie uit die ry gaan nie, want jou perd loop
net agter ‘n sekere perd.
Kry jou perd
Met aankoms word jy vriendelik ontvang deur Cowboy
en Anne-Marie (en die twee foksterriërs), waarna jy jou
naam op ‘n wit veselglas-donkie gaan skryf. Dan word
die pragtige perde aan jou gewys en voorgestel. (Dit is
werklik van die mooiste, bes-versorgde perde wat ek nog
ooit gesien het.) Jy kry kans om met jou perd te “bond” voor
die rit. Jy kan selfs bystaan met die opsaal van die perde –cowboy-saals, natuurlik. Jy word absoluut deel gemaak van
alles.
Sodra elkeen se perd gereed is, word daar seker
gemaak dat almal gemaklik is. Daar word seker gemaak
dat die stiebeuels lank genoeg is en dat die buikgorde styf
genoeg vasgemaak is. Dan word die stuurmetode aan jou
verduidelik.
Leer die taal
Voor die rit begin, word die
“veldtaal” en rystyl aan jou
verduidelik. Die “veldtaal” is nou
die handgebare wat gebruik word
om gate in die veld uit te wys. Die
ruiter voor jou wys met sy/haar
haar hand na waar die gat is dan
moet jy dit weer vir die een agter
jou wys. Die rystyl is Western en
die aanhits en stop word aan jou
verduidelik. Dan begin die plesierrit, van omtrent twee ure
tussen en oor die rantjies, tussen die klowe, doringbome,
bosse, witstinkhoutbome, wild en oor verskeie aangrensende
plase.
Om tussen ‘n trop swartwitpense te ry is absoluut
fantasties; geen mens kan so naby die wild kom as te perd
nie. Selfs die vlakvarke en steenbokkies is soveel rustiger
as mens te perd tussen hulle ry. Elke geskiedkundige deel
(soos byvoorbeeld die graf van die soldaat in die Boereoorlog)
word aan jou vertel. Cowboy deel ook sy kennis van
die natuur met jou. Daar word voortdurend tydens die rit
na jou omgesien.
Met die terugkeer ná die heerlike rit, word die perde
afgesaal en elkeen kry kans om sy perd in die kampie met
wortels te bederf en te groet.
 |
Cowboy Kleinhans (regs), eienaar van Golden Eagle Trail Rides, saam met ‘n besoeker
|
Die watergat
Maar nog is’t einde niet, want nou beweeg almal na die Golden
Eagle Saloon, waar jy vriendelik ingenooi word om ‘n heerlike
koppie koffie, tee of ‘n koeldrank te geniet. Hier word jy
omring met foto’s van perde, foto’s van ritte wat gery was
en ‘n paar grappige stories teen die mure. Dan is daar die
ou lekker stofie wat die winterkoue wegbrand. Die cowboysaal
in die hoek met die tou waarmee daar beeswerk
gedoen was, is deel van die warm atmosfeer in die saloon.
Hier word rustig gesit en gesels oor lekker perdrystories.
Die kuiersessie is sommer ook die tyd wanneer jy jou
volgende rit bespreek.
 |
Daar is niks soos ’n lekker koppie cowboy-koffie voor mens vroegoggend wegspring nie
|
Die volgende rit
Geen rit by Golden Eagle is
ooit dieselfde nie. Elke rit is
besonders, want daar is soveel
verskillende roetes wat gery
word. Ons ry in feitlik enige
weersomstandighede en soms
word ons bederf met ‘n braai
of lekker cowboy-koffie. Soms
klim ons af van ons perde en lê sommer in die veld terwyl
jou perd langs jou wei.
Daar is ‘n perd vir elke tipe ruiter en daar is uiters gewilde
lang roetes wat gewoonlik in die winter gery word, en oor
baie kilometers strek – omtrent ‘n halwe dag op jou perd
se rug. Die rit strek ook oor verskeie aangrensende plase.
Onder die maan
Die gewilde maanlig-ritte vind meestal in die somer tydens
vol- of heldermaan plaas. Dit is ‘n rustiger rit en die perde
word gewoonlik so teen sewe-uur die aand opgesaal. En
wat is ‘n maanligrit dan nou ook as sonder ‘n lekker cowboykoffie
in die donker veld ...
Vir meer inligting omtrent Golden Eagle se ritte,
skakel 082 313 0210 of besoek
www.goldeneagletrailrides.co.za
|
